Gəncədə ustad dərsləri təşkil olunub. Bu haqda 8 mart tarixində Kəpəz televiziyasına istinadən məlumat veririk.
Azərbaycan Gimnastika Federasiyası tərəfindən şəhərimizdə ilk dəfə ustad dərsləri baş tutub. Burada Nizami yurdunun idmançıları ilə birlikdə 7 şəhər və rayondan olan gimnastlar da iştirak ediblər. Master-klaslar yığma komandanın məşqçiləri tərəfindən keçirilib. Burada 4 yaşdan 14 yaşadək gimnastika ilə məşğul olan idmançılar iştirak ediblər.
Ustad dərslərində ümumi və xüsusi fiziki hazırlıqla yanaşı, müxtəlif alətlərlə ayrı-ayrı texnikalar öyrədilib. Uşaq və yeniyetmələrin bilik və bacarıqlarının artırılması və təkmilləşdirilməsi məqsədilə təşkil edilən ustad dərslərində 100-dən çox gimnast iştirak edib.
Bura Gəncə ilə yanaşı, Bakı, Zaqatala, Goranboy, Şəmkir, Oğuz, Qəbələ və Mingəçevir klublarını təmsil edən idmançılar da qatılıblar.
