Gəncə şəhərində, xüsusən də mərkəzi küçələrdə son günlər sahibsiz itlərin sayının kəskin azalması müşahidə olunur.
Gencexeber.az-a şəhər sakinləri və heyvansevərlər bildiriblər ki, küçə itləri xüsusi ayrılmış avtomobillərlə toplanaraq ərazilərdən uzaqlaşdırılır. İşçilərin torlardan istifadə edərək heyvanları tutduqları qeyd olunur.
Maraqlı məqamlardan biri isə odur ki, tutulan itlərin çox hissəsi artıq tibbi prosedurlardan keçmiş, qısırlaşdırılmış və qulaqlarında buna dair xüsusi birkası olan heyvanlardır. Fəalların sözlərinə görə, vətəndaşlar işçilərdən itlərin hara aparıldığını soruşduqda, onlar bəzən cavab verməkdən imtina ediblər, digər hallarda isə avtomobillə sürətlə uzaqlaşıblar.
Yalnız bir dəfə onların sığınacağa aparıldığı bildirilib. Lakin məlum olduğu kimi, Gəncədə 2023-cü ildə yaradılmış "Yuva" sığınacağı bu ilin yanvar ayında ianələrin kifayət etməməsi səbəbindən fəaliyyətini dayandırıb. Orada saxlanılan itlər şəhər ərazisinə buraxılmışdı.
Heyvansevərlərin iddialarına görə, bir neçə gün öncə toplanan itlərin bəziləri tələf olub. Səbəb kimi avtomobillərdə heyvanların sıx şəkildə daşınması göstərilir.
Bir müddət sonra heyvansevərlər işçilərlə əlaqə saxlaya biliblər. Onlara bildirilib ki, itlər Bakının Qaradağ rayonuna aparılır. Lakin baş verən qeyri-adi hal bu məlumatın həqiqətə uyğun olmadığını üzə çıxarıb. Belə ki, şəhər sakinlərindən birinin şəxsi iti də həmin şəxslər tərəfindən götürülüb. Həmin sakin redaksiyamıza açıqlamasında bildirib ki, işçilərdən görüntülü rabitə yaratmağı tələb edib. Ekranda gördükləri isə onu heyrətə salıb. Söhbət zamanı itlərin kiçik qəfəslərdə sıx şəkildə, ac və susuz saxlanıldığını müşahidə edib və öz itini də həmin qəfəsdə olduğunu müşahidə edib.
