Gəncədə "Bolt" tətbiqi vasitəsilə taksi xidməti göstərən sürücülər qanunsuz fəaliyyət göstərən həmkarlarına etiraz ediblər.
Gencexeber.az-ın məlumatına görə, sürücülərin bir qismi avtomobillərini Azərbaycan Yerüstü Nəqliyyat Agentliyi (AYNA) Gəncə regional şöbəsi qarşısında saxlayaraq narazılıqlarını bildiriblər. Onlar uzun müddətdir Gəncə ərazisində qanunsuz taksi fəaliyyəti göstərən şəxslərin cəzalandırılmadığını qeyd ediblər.
Məlum olduğu kimi, Nazirlər Kabinetinin qərarına əsasən, 1 iyul 2024-cü ildən etibarən taksi fəaliyyəti yalnız istehsal tarixi 8 ildən az olan avtomobillərlə mümkündür. Bundan başqa, Dövlət İmtahan Mərkəzi tərəfindən sürücülərin xüsusi hazırlıq keçməsi və imtahandan uğurla keçərək şəhadətnamə alması da tələb olunur.
Lakin etiraz edən sürücülər bildirirlər ki, Gəncədə bu qaydalara əməl etmədən, icazəsiz və şəhadətnaməsiz fəaliyyət göstərən çoxsaylı taksilər var. Bu isə ədalətli rəqabəti pozur və qanuni fəaliyyət göstərən sürücülərin qazancına mənfi təsir göstərir.
"Mən bütün sənədlərimi qaydasına salmışam, imtahan vermişəm, amma baxıram ki, çox adam qanunsuz işləyir. Əgər qanun qoyulubsa, hamıya eyni qaydada tətbiq olunmalıdır", – "Bolt" sürücüsü qeyd edib.
Etiraz edən sürücülər əlavə ediblər ki, yeni avtomobillərin alınması üçün götürdükləri kreditləri ödəməkdə çətinlik çəkirlər və məsələ ilə bağlı aidiyyəti qurumlardan tədbir görülməsini tələb edirlər.
