"BakuBus" MMC sentyabrın 28-dən etibarən Gəncədə şirkətin istismarına verilmiş marşrut xətlərinin fəaliyyətinə başlayıb. Lakin sərnişinlər yeni sistemdən ciddi narazılıq edirlər. Şikayətlər əsasən dayanacaqların arasındakı məsafə, avtobusların intervalı və sürücülərin davranışı ilə bağlıdır.
Gencexeber.az məlumat verir ki, şəhər sakinləri bildirirlər ki, bəzi dayanacaqlar arasında məsafələr həddən artıq çoxdur. Məsələn, 22 saylı məktəbin yaxınlığında dayanacaq yoxdur, yalnız "Cırtdan park" və "Bağman" adlanan tarixi məhəllələrin ərazilərində dayanacaqlar yerləşdirilib. Şagirdlər və tələbələr dərsə getmək üçün yolun böyük bir hissəsini piyada qət etmək məcburiyyətində qalırlar. Sakinlər xüsusilə qış mövsümündə uşaqların soyuqda əziyyət çəkəcəyini vurğulayırlar.
Bundan başqa, 14 nömrəli avtobus xətti üzrə cəmi 4 avtobus istismara buraxılıb. Sakinlərin sözlərinə görə, bu səbəbdən nəqliyyat vasitələri arasında bir saat interval yaranıb. 6 nömrəli avtobusu gözləyən 30-dan çox ikinci növbədə təhsil alan məktəb şagirdi isə nəqliyyat vasitəsinin gəlib çıxmadığına görə, evlərinə piyada gedib.
Sakinlər həmçinin sürücülərin davranışından da şikayət edirlər. Dünən 8 nömrəli marşrutda bir sərnişinə əlində kiçik paket olduğuna görə avtobusa minməyə icazə verilməyib. Sözügedən məntiqə sığmayan davranış şirkətin daxili qaydaları ilə əlaqələndirilib. Gəncəlilər sürücülərin sərnişinlərə qarşı daha mədəni münasibət göstərmələrini tələb edirlər.
Şəhər sakinləri bildirirlər ki, əgər avtobusların sayı az, intervallar isə uzun olacaqsa, bu barədə qabaqcadan məlumat verilməlidir. Vətəndaşlar da hansı avtobusun hansı intervalla işlədiyini əvvəlcədən bilib gündəlik işlərini ona uyğun tənzimləyə bilsinlər. Hazırda insanlar avtobus tapa bilmədikdə məcburən taksi xidmətindən istifadə edirlər ki, bu da əlavə maddi yük yaradır.
Qeyd edək ki, bu gün "BakuBus" MMC-nin 16, 19 və G2 nömrəli marşrut xətləri fəaliyyətə başlayıb.
