Gəncə şəhərində avtobusların hərəkət intervalının uzun olması ilə bağlı şikayətlər səngimir.
Gencexeber.az-a hər gün ünvanlanan yüzlərlə şikayətlərdə bildirilir ki, şəhər üzrə marşrut xətlərində aparılan optimallaşdırma çərçivəsində sentyabrın 28-dən "BakuBus" MMC-nin istismarına verilmiş marşrut xətlərinin fəaliyyətə başlaması ilə vəd edilən rahatlıq təmin edilmir. Əksinə, sakinlərin iddialarına görə, xüsusilə səhər saatlarında avtobuslar çox gec gəlir. Bu da işə və dərsə tələsən insanların ciddi narahatlığına səbəb olur.
"4 nömrəli marşrut xəttində səhər saatlarında vəziyyət çox bərbaddır. Hər gün 20 dəqiqə marşrut gözləyirik. Sürücüdən soruşanda deyir ki, interval 10 dəqiqədir, amma biz 20-25 dəqiqə gözləyirik, gəlmir. Deyirlər, dispetçer belə təyin edir.
Avtozavoddan çıxan marşrut xətləri heç cür tənzimlənmir. Azərbaycan Yerüstü Nəqliyyat Agentliyinin şikayətlər üzrə qaynar xətti - "141"lə əlaqə saxlamaq da mümkün deyil. Biz şikayətimizi hara edək?" - şikayətçi bildirib.
Vətəndaşların sözlərinə görə, bu problem artıq uzun müddətdir davam edir:
"Hər gün bu hal yaşanır. Gülüstanda ən azı 20 dəqiqə gözləyirik. Hətta dünən sürücü ilə mübahisə yarandı, dedi ki, mənə bu saatda çıx deyirlər, mən də çıxıram. Əlbəttə ki, sürücü deyil, dispetçer vaxtı düzgün təyin etmir", — sakin əlavə edib.
Qeyd edək ki, "BakuBus" MMC daha əvvəl Gencexeber.az-a açıqlamasında yaranmış interval problemlərini Gəncə Avtoparkına verilmiş 280 avtobusun bir qisminin III MDB Oyunlarına cəlb olunması ilə əlaqələndirmişdi. Lakin həmin yarışların oktyabrın 8-də başa çatmasına baxmayaraq, vəziyyətdə gözlənilən yaxşılaşma müşahidə edilmir.
Gəncəlilərin fikrincə, bu problem həm sərnişin axınının, həm də şəhərdaxili nəqliyyatın səmərəliliyinə mənfi təsir göstərir. Onlar aidiyyəti qurumlardan məsələ ilə bağlı ciddi tədbirlər görülməsini tələb edirlər.
