Gəncə şəhəri 3-cü mikrorayon ərazisində, 1-ci və 2-ci binaların qarşısında aparılan qazıntı işlərindən sonra asfalt örtüyünün vurulmaması sakinlərin narazılığına səbəb olub.
Məsələ ilə bağlı Gencexeber.az-a şikayət ünvanlayan sakinlər bildirir ki, 2020-ci ildə həmin ərazidə su və kanalizasiya sistemi çəkilib.
O vaxt sakinlərə deyilib ki, dağıdılan asfalt örtüyü yenidən bərpa ediləcək. Lakin vədlər yerinə yetirilməyib. Artıq 5 ildir ki, təxminən 200-ə yaxın ailə yol problemləri ilə üz-üzədir.
Şikayətçilər bildirirlər ki, dəfələrlə aidiyyəti qurumlara və şəhər İcra Hakimiyyətinə müraciət etsələr də, nəticə olmayıb. Onların sözlərinə görə, məsələ ilə bağlı rəsmi şəxslər əraziyə baxış da keçirməyib.
Gəncə şəhər İcra Hakimiyyətindən redaksiyamıza bildirilib ki, hazırda şəhərdə abadlıq işləri mərhələli şəkildə həyata keçirilir.
Qeyd olunub ki, digər ərazilərlə yanaşı, sözügedən ünvanda da asfaltlanma işləri aparılacaq.
