Vaxtilə yerli sakinlərin ən sevimli istirahət məkanlarından biri olmuş park hazırda baxımsız və yararsız vəziyyətdədir.
Gencexeber.az-a müraciət edən sakinlərin sözlərinə görə, sözügedən istirahət guşəsi Gəncə ilə bitişik Samux rayonunun İnstitut qəsəbəsi ərazi vahidində, "İmamzadə" dini kompleksinə aparan yolun kənarında yerləşir.
Bildirilib ki, parkın yaxınlığında iki məktəb və iki uşaq bağçasının fəaliyyət göstərməsinə, eləcə də qəsəbənin 2000-dən çox insanın yaşamasına baxmayaraq, illərdir burada heç bir təmir-bərpa işi aparılmayıb.
Sakinlərin sözlərinə görə, park ərazisindəki futbol meydançası da yararsız vəziyyətdədir. Həmçinin ərazidə vaxtilə süni göl mövcud olub.
"Parkın hazırda iri çuxura bənzər hissəsi vaxtilə süni göl idi. Onun axarı parkın sonuna qədər uzanırdı, şəlalə kimi axan yeri də vardı. Bura vaxtilə Gəncənin ən gözəl parklarından biri hesab olunurdu", – sakin bildirib.
Sakinlər illərin tozuna bürünmüş parkın yenidən dirçəldiləcəyinə ümid edirlər. Onlar Samux Rayon İcra Hakimiyyəti ilə yanaşı aidiyyəti qurumlardan sükutu pozaraq əraziyə baxış keçirilməsini və bir vaxtlar insanların sevimli istirahət guşəsi olan bu parkın yenidən həyata qaytarılmasını xahiş edirlər.
