Gəncədə tələbələrlə görüş keçirilib. Bu haqda 2 mart tarixində GDU-ya istinadən məlumat veririk.
Rəqəmsal İnkişaf Agentliyinin həyata keçirdiyi “Technest” Təqaüd Proqramı barədə tədbir Gəncə Dövlət Universitetində baş tutub. Burada təhsil ocağının Tədris məsələləri üzrə prorektoru Şahin Xurşudov çıxış edərək informasiya texnologiyaları sahəsində nəzəri bilikləri yüksəltməyin önəmindən və bu sahədə yaradılan imkanlardan danışıb. O, tələbələrə Təqaüd Proqramından yararlanmağı tövsiyə edib.
İnnovasiya və Rəqəmsal İnkişaf Agentliyinin layihə meneceri Gülnar Mirhüseynova təqaüd proqramı haqqında ətraflı məlumat verib, layihənin əhəmiyyətindən, burada yer alan proqramlar və qəbul şərtlərindən danışıb. Həmçinin İnnovasiya və Rəqəmsal İnkişaf Agentliyi və Gəncə Dövlət Universiteti arasında əməkdaşlığa əsasən, ötən il GDU-nun 66 tələbəsinin ”İT mütəxəssisi” təlimlərində uğurla iştirak edib məzun adını qazanması əlavə olunub. Bu il isə universitet üzrə daha 36 tələbə təlimlərə cəlb olunacaq. “Code Academy”nin ixtisaslı mütəxəssisləri tərəfindən gənclərə İT sahəsində 5 ay müddətində dərslər keçiriləcək.
Görüş zamanı “Code Academy”nin fəaliyyətindən danışılıb. Sonda tələbələrin sualları cavablandırılıb.
