Gəncədə təhsil ocaqlarından biri xarici universitetlə anlaşıb. Bu haqda 25 yanvar tarixində Gəncə Dövlət Universitetinə istinadən məlumat veririk.
Türkiyənin Qars Qafqaz Universitetinin rektoru Hüsnü Kapunun rəhbərlik etdiyi nümayəndə heyəti, Azərbaycanın Türkiyə Respublikasındakı Səfirliyinin təhsil məsələləri üzrə müşaviri Nəcibə Nəsibovanın müşayiəti ilə Gəncə Dövlət Universitetinə baş çəkib. Qonaqlar burada ali təhsil ocağının rektoru Yusif Yusibovla görüşüblər.
Tədbirdə GDU-nun Tədris məsələləri üzrə prorektoru Şahin Xurşudov və İnnovasiyalar Departamentinin direktoru Vasif Həsənov da iştirak ediblər. Yusif Yusibov ali təhsil ocağının tədris, elmi fəaliyyəti, beynəlxalq əlaqələri, Türkiyənin bir neçə nüfuzlu universitetləri ilə əməkdaşlıq əlaqələri haqqında danışıb.
Qars Qafqaz Universitetinin rektoru Hüsnü Kapu rəhbərlik etdiyi təhsil müəssisəsinin fəaliyyət istiqamətləri, tədris olunan ixtisaslar və kadr hazırlığı üzrə aparılan işlərdən bəhs edib. Hər iki universitet arasında akademik mübadilə və əməkdaşlıq məsələləri müzakirə olunub.
Sonra tərəflər akademik əməkdaşlıq müqaviləsinə imza atıblar. Sənəddə tələbələrin, akademik və inzibati heyətin, nəşrlərin və digər müvafiq materialların qarşılıqlı mübadiləsi, birgə seminar, tədris proqramlarının təşkili, ortaq elmi-tədqiqat və inkişaf layihələrinin həyata keçirilməsi əksini tapıb.
