Gəncədə kollecdə 20 Yanvar faciəsi qurbanlarının xatirəsi anılıb. Bu haqda Regional Kollecə istinadən xəbər veririk.
Gəncə Dövlət Universitetinin nəzdindəki Regional Kollecdə tədbir keçirilib. Tədbirdən əvvəl kollecin direktoru dosent İlqar Kubışov və əməkdaşlar faciənin dəhşətlərini əks etdirən rəsm əsərlərindən ibarət sərgiyə baxış keçiriblər. Daha sonra şəhidlərimizin əziz xatirəsi bir dəqiqəlik sükutla yad edilib.
Anım günündə bildirilib ki, 1990-cı ildə baş verən 20 Yanvar faciəsi Azərbaycan tarixinə təkcə bir faciəli gün kimi deyil, xalqımızın əzminin, sarsılmaz iradəsinin sübutu və dövlət müstəqilliyinin bərpa edilməsinə doğru aparan yol, milli qürur doğuran bir gün kimi həkk olunub. Tədbirin sonunda 20 Yanvar hadisələrindən bəhs edən videoçarx nümayiş olunub.
