Gəncə Dövlət Universitetində Elmi Şuranın növbəti iclası keçirilib. Bu haqda 1 mart tarixində GDU-ya istinadən xəbər veririk.
İclasda uzunmüddətli səmərəli fəaliyyəti və yubileyi münasibəti ilə universitetin üç əməkdaşına Fəxri Fərman və mükafat verilib. Onlar Ümumi Pedaqogika kafedrasının müdiri Şahin Tağıyev, Anatomiya, fiziologiya və zoologiya kafedrasının müdiri Vəfa Məmmədova və Rus dili kafedrasının baş müəllimi Balabəy Qədirovdur. Həmçinin Riyazi analiz kafedrasının dosenti Abbas Hüseynova Fəxri professor diplomu təqdim olunub.
Daha sonra universitetin rektoru Yusif Yusibov Botanika kafedrasının əməkdaşı “Botanika” ixtisası üzrə fəlsəfə doktoru elmi dərəcəsinə layiq görülən Fidan İsayevaya Azərbaycan Respublikasının Prezidenti yanında Ali Attestasiya Komissiyası tərəfindən verilmiş müvafiq diplomu təqdim edib.
Elmi iclası giriş sözü ilə universitetin rektoru Yusif Yusibov açaraq, şura üzvlərini gündəlikdə duran məsələlərlə tanış edib. Sonda Tədris Departamentinin direktoru Elturan Yusifov geniş məruzə ilə çıxış edib. O, elektron təhsil texnologiyalarının tətbiqinin genişləndirilməsi və təhsil sistemində idarəetmənin informasiyalaşdırılması məqsədi ilə “Eduman” proqram təminatı haqqında məlumat verib.
