Gəncədə küçələrin birində yararsız hala düşən asfalt örtüyü “bərpa” edilib.
Xəbər verdiyimiz kimi, Adil xan Ziyadxanov küçəsində, Beynəlxalq xəstəxananın yanında avtomobil yolunun səthində iri çuxurlar əmələ gəlib. Hazırda yol örtüyünün vəziyyəti ilə bağlı məsələ hələ də aktual olaraq qalır.
Gencexeber.az məlumat verir ki, bir müddət öncə aidiyyəti xidmətlərin əməkdaşları əraziyə baxış keçirərək yolun həmin hissəsini təmir etmək əvəzinə sadəcə torpaqlayıblar. Bu səbəbdən sözügedən çuxurlar əvvəlki tək dərin olmasa da, nəqliyyat vasitələrinə yenə ziyan dəyir, eləcə də vətəndaşların təhlükəsizliyi üçün əlavə risklər yaranır. Bu problem xüsusilə avtomobil axınının artdığı vaxtlarda kəskinləşir.
Sakinlər və sürücülər yerli hakimiyyət orqanlarını, nəhayət ki, yolun əsaslı təmiri üçün tədbirlər görməyə çağırır.
