Xəbər verdiyimiz kimi, dövlət müəssisələrinin yerləşdiyi Bursa küçəsində əsaslı təmir işləri aparılıb: asfalt çəkilib, yolun kənarlarına yeni bordürlər düzülüb. Lakin naməlum səbəblərdən görülən işlər yarımçıq buraxılıb.
Gencexeber.az-a sözügedən məsələ ilə bağlı sakinlərin çoxsaylı şikayətləri daxil olub. Bildirilib ki, 600 metr uzunluğu olan küçənin təxminən 40 metri, Mircəlal Paşayev küçəsi ilə kəsişməyədək olan hissəsi, olduğu kimi – asfaltsız və baxımsız halda qalıb. Nəticədə abadlıq-quruculuq işləri üç yaşayış evi, eləcə də 1951-ci ildən Kəpəz rayonunda yaşayan əhalinin müxtəlif qrup oxucularına xidmət göstərən MKS-nin 5 saylı kitabxanasına çatmayıb.
Sakinlərin sözlərinə görə, təmir işləri zamanı aidiyyəti qurumun əməkdaşları yeraltı elektrik naqillərini zədələyiblər. Bu səbəbdən ərazi dörd gün işıqlandırılmayıb. Vətəndaşlar bununla bağlı dəfələrlə “Azərişıq” ASC-yə şikayət etdikdən sonra elektrik təchizatının bərpa edilməsinə nail ola biliblər.
Həmçinin bəhs etdiyimiz natamam təmirdən sonra küçənin müxtəlif hissələrində tikinti tullantıları qalıb.
Qeyd edək ki, 10 gündən çox müddət keçməsinə baxmayaraq vəziyyət dəyişməz olaraq qalır.
