Gəncə təmsilçisinin rəhbərliyi Türkiyə konsulu ilə görüşüb. Bu haqda 8 mart tarixində voleybol klubuna istinadən məlumat veririk.
“Gəncə” voleybol klubunun prezidenti Elvar Osmanov və Türkiyənin Gəncədəki Baş konsulu Recep Öztop arasında görüş baş tutub. Burada Osmanov “Gəncə”nin Azərbaycan Yüksək Liqasındakı çıxışı, komandanın ölkə çempionatının pley-off mərhələsinə vəsiqə qazanması və aşağı yaş qruplarından ibarət heyətin formalaşdırılması istiqamətində mühüm addımların atıldığını deyib. Bildirib ki, orta məktəblərdə seleksiya xarakterli məşqlər təşkil edilir, istedadlı yeniyetmələr komandalara cəlb olunurlar.
Recep Öztop kluba ölkə çempionatında uğurlar arzulayıb, Azərbaycanda idmana göstərilən dövlət qayğısının əhəmiyyətini diqqətə çatdırıb.
Daha sonra “Gəncə” klubu ilə Türkiyə komandaları arasında birgə əməkdaşlığın perspektivləri, qarşılıqlı təlim-məşq toplanışları və yoxlama oyunlarının təşkili barədə fikir mübadiləsi aparılıb.
Sonda Elvar Osmanov “Gəncə” klubunun formasını Recep Öztopa təqdim edib.
