Gəncə Dövlət Universitetində 2023 və 2024-cü tədris ilinin payız semestrinin imtahan sessiyasının gedişini izləmək məqsədilə mediatur təşkil olunub. Bu haqda 25 yanvar tarixində GDU-ya istinadən xəbər veririk.
Universitetdə tədbir zamanı prorektorlar imtahan prosesinin təşkili və keçirilməsi qaydasını izah ediblər. Onlar mövcud qanunvericiliyin tələbləri nəzərə alınmaqla bütün texniki-təşkilati işlərin vaxtında görüldüyünü, imtahan prosesinə kənar müdaxilənin yol verilməməsi və tələbələrin biliklərini nümayiş etdirməsi üçün lazımi şərait yaradıldığını qeyd ediblər. O da diqqətə çatdırılıb ki, hazırda imtahanlar qabiliyyət formasında və kompüterdə test üsulu ilə aparılır.
Tələbələrin biliyinin qiymətləndirilməsi üçün İmtahan Qərargahı, Apellyasiya Komissiyası və “Qaynar xətt” fəaliyyət göstərir. Sessiya zamanı üzrlü səbəbdən imtahanda iştirak etməyən və akademik borcu yaranmış tələbələr 2 və 14 fevral tarixlərində təkrar imtahan verə biləcəklər. Daha sonra mediatur iştirakçıları auditoriyalarda imtahan prosesini yaxından izləyiblər.
