Gəncə təmsilçisi məğlubiyyət zolağındadır. Bu haqda 10 fevral tarixində Kəpəz televiziyasına istinadən məlumat veririk.
Söhbət “Gəncə” basketbol klubundan gedir. Komanda son 5 oyunda qələbə qazanmaqda çətinlik çəkir. Bununla bağlı baş məşqçi Bedri Meriç açıqlama verib.
Mütəxəssisin sözlərinə görə, rəqiblər turnir cədvəlinin üst pillələrində yer alan güclü komandalar olub.
“Güc olaraq fərqimiz var. Ancaq bu, bəhanə olmamalıdır. Hər 3 qarşılaşmada yaxşı oyun nümayiş etdirdik. Əfsuslar olsun ki, təcrübəli xarici oyunçumuzu zədə səbəbindən itirdik. Ondan sonrakı hər 3 matçda hesabda önə də keçdik. Düşünürəm ki, bərabər oyun nümayiş etdirdik, amma matçların sonunda yenildik. Bundan sonrakı qarşılaşmalarda ümid edirəm ki, əvəzini çıxacağıq”, - deyə Meriç qeyd edib.
Baş məşqçi play-off üçün hər şeyi etməyə çalışdıqlarını bildirib.
Qeyd edək ki, “Gəncə” BK 16 xalla turnir cədvəlinin 9-cu pilləsində mövqe tutub.
