Gəncədə sakinləri kommunal problem narahat edir. Bu haqda Gencexeber.az-a 27 mart tarixində məlumat daxil olub.
Sözügedən hal şəhərin “DOS-6” adlanan ərazisində, Şah İsmayıl Xətai prospektində müşahidə olunur. 13 saylı binanın sakinləri bildirirlər ki, birinci mərtəbədəki mənzilin kanalizasiya dəliklərindən və binanın ətrafındakı quyudan çirkab çıxır. Nəticədə hər tərəfdə xoşagəlməz qoxular və antisanitar vəziyyət yaranır.
“Evdə suyu aça bilmirik. Su açan kimi hamamdan, mətbəxdən kanalizasiya daşmağa başlayır. Evin divarları yarıyadək su çəkib. Bina köhnədir, uçmasından qorxuruq. İcra Hakimiyyəti daxil olmaqla bütün aidiyyəti qurumlara müraciət etmişik. Heç kim gəlib baxmır. Evimiz çirkab içindədir. Bu məsələni heç cür həll edə bilmirik. Aidiyyəti qurumların problemin həlli üzrə tədbirlər görməsini istəyirik”, - deyə onlar qeyd ediblər.
