Gəncədə Təhsildə inkişaf və innovasiyalar üzrə VII qrant müsabiqəsi çərçivəsində tədbir baş tutub. Bu haqda 22 fevral tarixində Regional Təhsil İdarəsinə istinadən xəbər veririk.
41 nömrəli tam orta məktəbin Coğrafiya müəllimi Səbinə Qədirovanın fərdi kateqoriya üzrə qalib olduğu “Daşkəsən məktəbliləri debatda” layihəsinin bağlanış tədbiri keçirilib. Burada Regional Təhsil İdarəsinin müdiri Anar Qədiməliyev, Daşkəsən Rayon İcra Hakimiyyəti başçısının səlahiyyətlərini müvəqqəti icra edən Vüqar Məmmədov və "Vətəndaş Cəmiyyətində Debat" İctimai birliyinin nümayəndəsi, layihənin təlimçisi Elşən Məmmədov, müəllim və şagirdlər iştirak ediblər.
Panel görüşündə "Natiqliyin Karyera və Təhsildə rolu" mövzusunda müzakirələr aparılıb. Daha sonra 2 nömrəli tam orta məktəbin "Qütb Ulduzları" komandası qalib, 1 nömrəli tam orta məktəbin "Əjdahalar" komandası finalçı seçilərək qalib olub. Yekunda qaliblər və ən yaxşı 10 natiq mükafatlandırılıblar. Eyni zamanda bütün şagirdlər iştirakçı sertifikatı ilə təltif olunublar. Layihə müddətində 250-yə yaxın şagird arasından 45 şagird seçilərək "Natiqlik", "Düzgün ünsiyyət strategiyası”, "Liderlik", "Debat" təlimlərinə cəlb olunublar.
