Gəncədə arx kənarında yaşayan sakinləri narahat edən məsələ yaranıb. Bu haqda Gencexeber.az-a 25 mart tarixində məlumat daxil olub.
Söhbət şəhərin Burla Xatun küçəsindəki 27 nömrəli Körpələr Evi-Uşaq Bağçasının yaxınlığından gedir. Sakinlərin sözlərinə görə, evlərin qarşısından keçən arxın içində natəmizlik hökm sürür. Bu səbəbdən kanaldan xoşagəlməz qoxu gəlir.
Həmçinin arxın üzərində kustar üsulla körpü hazırlanıb. Lakin o, qəzalı vəziyyətdədir.
“Qonşularla özümüz taxta qoyaraq, körpüyə bənzər bir qurğu hazırlamışıq. Amma üzərindən keçmək çox çətindir. Hər gün bu yolla uşaqlarımızı bağçaya və məktəbə aparırıq. Arxdan da çox pis iy gəlir. Bu ərazidə antisanitar vəziyyət hökm sürür. Aidiyyəti qurumlardan arxın təmizlənərək səliqəyə salınmasını və yeni körpü ilə təchiz edilməyimizi xahiş edirik”, - deyə sakinlər bildiriblər.
