Bu gün şəhid Bayram Məmmədov və Elşən Mirzəyevin doğum günüdür.
Bayram Fəxrəddin oğlu Məmmədov 20 mart 1965-ci ildə Gəncədə anadan olub. Orta təhsilini 16 saylı orta məktəbdə alıb. 1983-1985-ci illərdə həqiqi hərbi xidmətdə olub. Xidməti başa vurduqdan sonra bir müddət Gənclik Mədəniyyət sarayında təsərrüfat müdiri işləyib.
1991-ci ildə o, könüllü olaraq cəbhəyə yollanıb. Todan, Çaykənd, Laçın, Cəbrayıl, Ağdərə, Cəbrayıl rayonunun Sur kəndi uğrunda gedən döyüşlərdə igidlik göstərib. Bayram Fəxrəddin oğlu Məmmədov Şişqaya uğrunda gedən döyüşdə şəhidlik zirvəsinə ucalıb. 17 avqust 1992-ci ildə o, Gəncə Şəhidlər Xiyabanında dəfn olunub.
Elşən Həsən oğlu Mirzəyev 20 mart 1975-ci ildə Gəncədə anadan olub. Orta təhsilini 28 saylı orta məktəbdə alıb. 1993-cü ildə Bakı Ali Birləşmiş Komandanlıq Məktəbinə daxil olub. Leytenant Elşən Mirzəyev 21 iyun 1998-ci ildə 476 saylı hərbi hissədə bölük komandiri kimi hərbi xidmətə başlayıb.
Leytenant Mirzəyevə sonuncu döyüş tapşırığı 26 avqust 1998-ci ildə verilib. İki saata yaxın gedən döyüşdən sonra əsir düşməmək üçün Elşən və digər iki döyüş dostu bir-birlərinə sarılaraq əl qumbarası ilə özlərini partladıb şəhidlik zirvəsinə ucalıblar.
