Bu gün şəhidlər Elşən Tağıyev, Sahib Heydərov, İbrahim Mehdiyev və Vüqar Əliyevin doğum günüdür.
Elşən Sadiq Oğlu Tağıyev 8 mart 1975-ci ildə Gəncədə anadan olub. Orta təhsilini 7 nömrəli məktəbdə aldıqdan sonra 1991-ci ildə 9 saylı texniki-peşə məktəbinə daxil olub.
15 aprel 1993-cü ildə Elşən həqiqi hərbi xidmətə çağırılıb. O, Ağdərə və Ağdam bölgələrində, həmçinin Tovuz rayonunun Əlibəyli kəndinin müdafiəsində iştirak edib. Elşən Sadiq oğlu Tağıyev 4 mart 1995-ci ildə ağır döyüşlərin birində şəhidlik zirvəsinə ucalıb. Onun meyitini tapmaq mümkün olmayıb.
Sahib Zülal oğlu Heydərov 8 mart 1972-ci ildə Qazaxıstanın Karaqanda vilayətinin Saxan qəsəbəsində anadan olub. 1980-ci ildə Sahibin ailəsi Gəncəyə köçüb. O, orta təhsilini 19 nömrəli məktəbdə alıb. Daha sonra, 1987-ci ildə Gəncə şəhər Maşınqayırma Texnikumuna daxil olub.
1992-ci ildə Sahib könüllü olaraq cəbhəyə yollanıb. Burada bir çox döyüşlərdə igidlik göstərib. Sahib Zülal oğlu Heydərov 22 dekabr 1993-cü ildə Füzuli rayonunun Kürdmahmudlu kəndi uğrunda gedən döyüşlərin birində şəhid olub. O, Gəncə Şəhidlər xiyabanında dəfn olunub.
İbrahim Qərib oğlu Mehdiyev 8 mart 1960-cı ildə Gəncədə anadan olub. O, 4 nömrəli orta məktəbdə oxuyub. 20 avqust 1992-ci ildə həqiqi hərbi xidmətə yollanıb.
25 oktyabr 1992-ci ildə “URAL” markalı maşınla döyüşçülərə ərzaq apararkən Sərsəng Su Anbarının yaxınlığında pusquya düşüb. Burada İbrahim Qərib oğlu Mehdiyev şəhidlik zirvəsinə ucalıb. O, Gəncə Şəhidlər xiyabanında dəfn olunub.
Vüqar Yaşar oğlu Əliyev 8 mart 1969-cu ildə Gəncədə anadan olub. 3 saylı orta məktəbdə təhsil alıb. 1987-1989-cu illərdə hərbi xidmətdə olub. Qayıtdıqdan sonra kommersiya mağazasında işə başlayıb.
1992-ci ilin sentyabrında könüllü olaraq Gəncə ərazi Özünümüdafiə batalyonuna qoşulub. Vüqar Yaşar oğlu Əliyev 25 oktyabr 1992-ci ildə İbrahim Mehdiyevlə Ağdərəyə ərzaq apararkən pusquya düşüb və burada şəhidlik zirvəsinə ucalıb. 26 oktyabrda Gəncə şəhər Şəhidlər xiyabanında dəfn olunub.
