Gəncə sakinləri küçələrində kanalizasiya sisteminin olmamasından narahatdırlar. Bu haqda 28 dekabr tarixində Kəpəz televiziyasına istinadən xəbər veririk.
Söhbət şəhərin Qarabağ küçəsi, 63B ünvanından gedir. Adıçəkilən küçəyə kanalizasiya sistemi çəkilsə də, ümumi şəbəkəyə qoşulmayıb. Ərazidə su xətləri salınan zaman qazıntı işləri aparılıb. Bu səbəbdən küçənin yolu yararsız vəziyyətə düşüb. Bu da piyadaların və avtomobillərin hərəkətində çətinlik yaradır.
Sözugedən məsələ Səmədağa Kəsəmənli küçəsində də mövcuddur. Ərazidə yaşayan sakinlər məhəllələrinə asfalt örtüyünün və kanalizasiya xəttinin çəkilməsini arzu edirlər.
Analoji vəziyyət, həmçinin Bülbül, Neyman Vəliyev və Fərman Quluyev küçələrində müşahidə olunur. Burada 500-ə yaxın vətəndaş yaşayır.
“Kanalizasiyalarımız işləmir, yolumuzu qazıblar, amma düzəltməyiblər”, - deyə sakinlər qeyd ediblər.
“Azərsu” ASC-nin şöbə rəisinin sözlərinə görə, həmin küçələr layihə planına salınıb. Ərazilərdə su və kanalizasiya xətlərinin çəkilməsi və işlərin yekunlaşması planlaşdırılır.
