Gəncə beynəlxalq əməkdaşlıq imkanlarını artırmaqda davam edir. Bu haqda Gencexeber.az-a 8 aprel tarixində məlumat daxil olub.
“Azərbaycanın regionlardakı ali təhsil müəssisələrinin beynəlxalq əməkdaşlıq imkanlarının genişləndirilməsinə dəstək” layihəsinin ilk mərhələsi start götürüb. Burada məqsəd regionda yerləşən ali təhsil müəssisələrinin beynəlxalq imkanlardan yararlanmaq istiqamətində biliklərinin artırılması və müvafiq vərdişlərinin formalaşdırılmasıdır. Təlimdə ali təhsil müəssisələrinin beynəlmiləlləşmə strategiyaları, mövcud vəziyyətin təhlili kimi mövzular izah olunub və iştirakçılarla praktik məşğələlər həyata keçiriib.
Layihənin birinci mərhələsi olan təlim kursu fərqli regionlardan olan 6 ali təhsil müəssisəsinin ümumilikdə 20 nəfər potesial əməkdaşının iştirakı ilə Gəncə şəhərində davam edəcək. Təlimlərdən sonrakı mərhələdə isə 1 ay müddətində layihə ekspertləri tərəfindən universitet əməkdaşları üçün onlayn formatda mentorluq proqramı həyata keçiriləcək. Mentorluq proqramı əsasında əməkdaşlar artıq real layihə təkliflərini formalaşdırmaq üzərində işləyəcəklər.
Qeyd edək ki, layihə Azərbaycan Respublikasının Elm və Təhsil Nazirliyi tərəfindən elan olunan “Təhsildə könüllü fəaliyyətin təşkili” qrant müsabiqəsinin qalib layihələrindən biridir. Azərbaycan Respublikasının Elm və Təhsil Nazirliyinin dəstəyi və “Gələcəyə Körpü” Gənclər İctimai Birliyinin təşkilatçılığı ilə keçirilir.
