Gəncə təmsilçisinin baş məşqçisi növbəti matç haqda danışıb. Bu haqda 13 yanvar tarixində basketbol klubuna istinadən məlumat veririk.
“Gəncə” BK-nın baş məşqçisi Bedri Meriç “Sabah”la matça səylə hazırlaşdıqlarını söyləyib. Türkiyəli mütəxəssis bütün diqqətin həftəsonu reallaşacaq görüşə yönəldiyini bildirib:
“Rəqibimiz liqanın səviyyəsindən üstün olan bir kollektivdir. Avrokubok yarışları üçün yığılmış heyətləri var. Bizim təqvimlə bağlı şanssızlığımız var. Startda ard-arda iddialılarla oynayırıq. Çempionatın 3 ən yaxşı klubu ilə indi də evdə qarşılaşacağıq. Liqanın əvvəlində tam olaraq hazır deyildik, zaman irəlilədikcə uyğunlaşma yarandı. Uşaqlar bir-birilərinə inanırlar. Öz meydanımızda oynamağın üstünlüyü də var. “Sabah”a qarşı matçda sürpriz etmək istəyirik. Gəncədəki oyunlarda rəqibləri çətin vəziyyətə salmağa çalışacağıq. Onları asan mübarizə gözləmir. Pley-off yolunda üstünlük qazanmaq istəyirik.”
Bedri Meriç basketbolçuların fasilə müddətindəki fərdi hazırlığından da danışıb. O, oyunçuların çəki ilə bağlı probleminin yaranmadığını vurğulayıb:
“Tətilə gedən oyunçuların məşq proqramını özüm izlədim. Hamısı tapşırıqlara uyğun çalışdılar. Fiziki cəhətdən hər hansı problem yoxdur. Məşqdən də geri qalmayıblar. Kluba yaxşı durumda qayıdıblar.”
Qeyd edək ki, "Gəncə" - "Sabah" qarşılaşması 14 yanvar tarixində saat 18:00-da başlayacaq.
