Gəncədə növbəti aksiya baş tutub. Bu haqda 16 fevral tarixində Ekologiya və Təbii Sərvətlər nazirliyinə istinadən məlumat veririk.
Təşəbbüs “Batareyaları təhvil ver, təbiəti qoru” layihəsi çərçivəsində təşkil olunub. Askiya “Access Bank”ın filialında həyata keçirilib. Burada işlənmiş batareyalar toplanaraq, "Təhlükəli Tullantılar" MMC-yə təhvil verilib.
Layihə çərçivəsində müxtəlif dövlət qurumlarında, şirkətlərdə, marketlər şəbəkələrində, təhsil müəssisələrində, banklarda və hotellərdə - ümumilikdə 300-dən çox məntəqədə təhvil qutuları yerləşdirilərək dəstək verilir. Bu günədək 1362 kiloqram işlənmiş batareya təhvil alınıb.
Qeyd edək ki, batareyaların tərkibindəki ağır metallar və digər zəhərli komponentlər ətraf mühitə və insan sağlamlığına potensial təhlükə yaradır. İstifadəyə yararsız elektrik batareyalarının çeşidlənməsi və xüsusi şəraitdə zərərsizləşdirilməsi məqsədilə Ekologiya və Təbii Sərvətlər Nazirliyi və Qırmızı Ürəklər Fondu tərəfindən 1 may 2022-ci il tarixində “Batareyaları təhvil ver, təbiəti qoru” layihəsinə start verilib.
