Gəncədə bir sıra ticarət obyektlərində sakinləri narahat edən məsələ var. Bu haqda Gencexeber.az-a 21 noyabr tarixində məlumat daxil olub.
Sakinlərdən biri “Keçəllər” adlanan ərazidəki bəzi ticarət məkanlarından narazı olduğunu bildirib. Onun sözlərinə görə, burada yerləşən aptekdə və qab-qacaq mağazasında 10 manatdan aşağı ödənişləri pos-terminal ilə etməyə icazə verilmir. Bu cür ödəniş etmək istəyənlərə isə əlavə 1 manat verməli olacaqları bildirilir.
Alıcılara kartdan karta (“C2C”) göndərmək və ya nağd ödəniş təklif edilir. Lakin bır sıra banklarda “C2C” əməliyyatında minimal 1 manat komissiya tutulur. Bu da vətəndaşların əlavə pul itkisinə səbəb olur.
“Biz bundan narazı olduğumuzu və şikayət edəcəyimizi bildirdik, amma satıcı: “hara istəyirsiz, gedin, deyin”, - söylədi. Pos-terminal işləyirsə, nəyə görə digər üsullarla ödəniş etməli oluruq? Bəzi hallarda isə cihazın işləmədiyini və ya “zaryadka”sının olmadığını bəhanə edirlər”, - deyə izləyicimiz bildirib.
Vətəndaşın verdiyi məlumata əsasən, o, məsələ ilə bağlı Vergilər İdarəsinə müraciət ünvanlayıb.
Qeyd edək ki, sözügedən problemlə əlaqədar redaksiyamıza çox sayda mesajlar daxil olur. Bu cür hallarla şəhərin bır sıra ticarət və ictimai iaşə obyektlərində rastlaşıldığı bildirilir. Vətəndaşlar məsələ ilə bağlı aidiyyəti qurumların müvafiq tədbirlər görməsini istəyirlər.
