Gəncədə növbəti beynəlxalq tədbir keçirilib. Bu haqda 18 dekabr tarixində Regional Mədəniyyət İdarəsinə istinadən məlumat veririk.
Azərbaycan Vokalçıları III Beynəlxalq Festivalının üçüncü günü Gəncə Dövlət Filarmoniyasında baş tutub. Tədbirdə konsert proqramı təşkil olunub.
Burada Xalq artisti Rafael Bayramovun dirijorluğu ilə Kamera Orkestri Azərbaycan və dünya bəstəkarlarının əsərlərini səsləndirib. Konsertdə Xalq artisti Sevinc İbrahimova, Əməkdar mədəniyyət işçisi Mehbarə Cəfərova, gənc ifaçılardan Rüstəm Cəfərov, Vasif Bayramov çıxış ediblər.
Həmçinin Dövlət Akademik Opera və Balet Teatrının solistləri Taleh Yahyayev və Günel Hacıyevanın ifaları maraqla qarşılanıb.
Sonda Müslüm Maqomayevin "Azərbaycan" mahnısı tamaşaçıların istəyi ilə ikinci dəfə səsləndirilib.
