Gəncədə Azərbaycan Texnologiya Universitetində təqdimat baş tutub. Bu haqda 6 fevral tarixində ATU-ya istinadən xəbər veririk.
İnnovasiya və Rəqəmsal İnkişaf Agentliyi Azərbaycan Texnologiya Universitetinə avadanlıqlar ianə edib. "Technest" layihəsi çərçivəsində universitetin İnnovasiya Mərkəzinə 3D printer, proyektor, kompüterlər və digər avadanlıqlar təqdim olunub.
Təqdimat zamanı agentlik nümayəndələri ATU-nun tələbələrinin startap layihələri ilə tanış olublar. Burada məqsədin universitetdə startap ekosisteminin inkişafına dəstək göstərmək, tələbələrin İKT sahəsində təlimlərdə praktik vərdişlər və bacarıqlar qazanmasına, əldə edilən biliklərin yeni ideyalara və startaplara çevrilməsinə nail olmaq olduğu bildirilib.
Tədbirdə rektor vəzifəsini müvəqqəti icra edən dosent Yaşar Ömərov, tədris işləri üzrə prorektor Raqif Hüseynov, İnnovasiya Mərkəzinin direktoru Şamo Salayev, İnnovasiya və Rəqəmsal İnkişaf Agentliyinin şöbə müdiri Orxan İsmayılov, layihə meneceri Gülnar Mirhüseynova, baş mütəxəssis Püstə Qasımova və tələbələr iştirak ediblər.
