Gəncədə universitetlərin birində bayram keçirilib. Bu haqda 15 mart tarixində ADAU-ya istinadən xəbər veririk.
Azərbaycan Dövlət Aqrar Universitetində Novruz bayramı münasibətilə tədbir baş tutub. Tədbirdən əvvəl tələbələrin və gənc rəssamların əl işlərindən ibarət sərgiyə və kafedralar tərəfindən hazırlanan Novruzla bağlı kulinariya nümunələrinə və xonçalardan ibarət guşələrə baxış keçirilib.
Tədbirin bədii hissəsində Kosa və Keçəlin məzəli səhnəcikləri, tələbə rəqs kollektivlərinin ifasında milli və müasir rəqslər, musiqili proqram maraqla izlənilib.
Sonda rektor Zəfər Qurbanov qazi tələbələrlə birgə bayram tonqalını alovlandırıb. Tonqalın ətrafında tələbələr yallı gedərək, milli birlik və həmrəyliyimizi ifadə ediblər.
