Gəncədə universitetlə şirkətlərdən birinin arasında müqavilə imzalanıb. Bu haqda 19 dekabr tarixində ATU-ya istinadən məlumat veririk.
Azərbaycan Texnologiya Universiteti ilə “Azəralüminium” MMC arasında mövcud əməkdaşlıq münasibətləri çərçivəsində universitetin tələbələri üçün xüsusi təqaüd təsis edilib. Bu barədə ATU-nun rektoru vəzifəsini müvəqqəti idarə edən Yaşar Ömərovla MMC-nin direktoru Maksim Cavadov arasında görüş keçirilib. Burada razılaşma əldə olunaraq saziş imzalanıb.
Sənədə əsasən, xüsusi təqaüd universitetin texniki və texnoloji ixtisaslarında təhsil alan, ən yüksək akademik göstəricilərə malik 2 tələbəsinə veriləcək. Təqaüdün məbləği hər bir şəxsə 100 manat müəyyən olunub və yeni təqvim ilindən etibarən hər ay verilməsi nəzərdə tutulub.
Müəssisə ilə universitet arasında əldə edilən digər razılığa əsasən, regionda məşğulluğa dəstək verilməsi baxımından “Azəralüminium”un kadr ehtiyatının daim sabit saxlanılması sahəsində fəaliyyətinin təmin edilməsi, mütəxəssis hazırlığının keyfiyyətinin yüksəldilməsi və əmək bazarının tələblərinə uyğun kadr hazırlanması məqsədilə “Azəralüminium” tərəfindən ATU-da 2 ixtisaslaşmış auditoriya qurulacaq. Yaxın zamanda bununla bağlı işlərə başlanılacaq.
Görüşdə, həmçinin "Metallurgiya mühəndisliyi" ixtisasının tədris planına müvafiq fənlər daxil etməklə onun yenilənməsinə və bunun üçün birgə işçi qrupun yaradılmasına dair razılığa gəlinib.
