Gəncədə açıq qapı günü keçirilib. Bu haqda 1 fevral tarixində ATU-ya istinadən məlumat veririk.
Tədbir Azərbaycan Texnologiya Universitetində baş tutub. Aksiya qış imtahan sessiyası ilə bağlı təşkil olunub. Burada valideynlər imtahan prosesini tələbələrin diqqətini yayındırmamaq üçün xüsusi otaqda monitor vasitəsilə izləyiblər.
Tədris işləri üzrə prorektor Raqif Hüseynov qonaqlara proses barədə məlumat verib. Bildirilib ki, monitorda əks olunan imtahan zallarında və auditoriyalarda gün ərzində 900-ə yaxın tələbə iştirak edir. Sessiyanın obyektiv və şəffaf keçirilməsi məqsədilə otaqlar müşahidə kameraları ilə təchiz olunub, imtahan korpusunda təklif və müraciətlər qutusu yerləşdirilib.
Valideynlər müşahidə zamanı Apellyasiya Komissiyasının sədri Mehman Kərimov və İmtahan Komissiyasının sədri Cəsarət Şabanovla həmsöhbət olub, prosesin gedişinə dair suallar verib, neqativ halların qarşısının alınması məqsədilə lazımi tədbirlərin görülməsini yüksək qiymətləndirib, övladlarının biliyinin şəffaf və obyektiv qiymətləndirilməsi üçün yaradılan şəraitdən məmnunluq ifadə ediblər.
