Gəncədə universitet yeni əməkdaşlığa başlayıb. Bu haqda 22 yanvar tarixində ATU-ya istinadən məlumat veririk.
Azərbaycan Texnologiya Universitetinin rəhbərliyi Naftalana səfər edib. Burada “Qarabağ”, “Çinar” və “Qaşaltı” hotellərinin rəsmiləri ilə görüş baş tutub.
Yığıncaqda ATU-nun rektoru vəzifəsini müvəqqəti icra edən Yaşar Ömərov, tədris işləri üzrə prorektoru Raqif Hüseynov, Turizm sənayesinin təşkili kafedrasının müdiri Yusif Hümbətov, “Garabagh Resort & Spa Naftalan Hotel”in direktoru Safi Orhan Kutluay, “Chinar Hotel & Spa Naftalan”ın direktoru Murat Gözütok, “Gashalti Health Hotel Naftalan”ın direktoru Rəşad Veyisov iştirak ediblər.
Görüşdə sözügedən hotellərlə universitet arasında əməkdaşlıq imkanları və perspektivləri, birgə kadr hazırlığı və birgə tədbirlərin (konfrans, seminar, forum, master-klas və digərləri) keçirilməsi məsələləri müzakirə olunub. Sonda ATU tələbələrinin sözügedən hotellərdə təcrübə keçməsi ilə bağlı müqavilə imzalanıb.
