Gəncədə Azərbaycan Texnologiya Universitetinin tələbələri üçün təsis edilən təqaüdlər ilk sahiblərinə təqdim edilib. Bu haqda 14 mart tarixində ATU-ya istinadən xəbər veririk.
Təqaüd “Azəralüminium” və “ATS Food” tərəfindən təşkil olunub. Mükafat qazananlar Avtomatika, Telekommunikasiya və İnformatika fakültəsinin informasiya texnologiyaları ixtisasının III kurs tələbəsi, 99,9 ballıq ümumi ortalama müvəffəqiyyət göstəricisi (ÜOMG) ilə Zibeydə Adışirinova, Kompüter mühəndisliyi ixtisasının IV kurs tələbəsi Ləman Mamedova (99.36), Qida mühəndisliyi fakültəsinin şərabçılıq ixtisasının IV kurs tələbələri Sürəyya Məhərrəmova ( 96.4) və Dürdanə Dadaşovadır (96).
Onların arasında ən yüksək göstəriciyə malik Zibeydə artıq üçüncü ildir ki, ÜOMG üzrə fakültə birinciliyini qoruyur. Ləman isə göstəriciləri ilə bu semestr daha bir Təhsilin İnkişafı Fondu və “NEQSOL Holding” in tələbə qızlar təqaüdünü qazanıb.
