Gəncədə universitetlərin birində rektorun gənclərlə toplantısı təşkil olunub. Bu haqda 2 fevral tarixində Azərbaycan Texnologiya Universitetinə istinadən xəbər veririk.
Azərbaycan Texnologiya Universitetinin rektor vəzifəsini müvəqqəti icra edən Yaşar Ömərovun Gənclər Günü münasibətilə bir qrup gənclərlə görüşü baş tutub. Tədbirdə rektor ölkəmizdə aparılan gənclər siyasətinin ən böyük uğurlarından birinin gənc nəslin vətənpərvərlik ruhunda formalaşması olduğunu bildirib. Dövlət başçısının bütün çağırışlarına cavab verən Azərbaycan gəncləri Vətən müharibəsi ərəfəsində könüllü şəkildə ordu sıralarına qoşularaq və döyüş meydanlarında şücaət göstərərək bunu bir daha əyani sübut etdiklərini qeyd edib.
Görüşdə Tələbə Gənclər Təşkilatının, Tələbə Həmkarlar İttifaqı Təşkilatının, Tələbə Elmi Cəmiyyətinin rəhbərləri və fəal üzvləri, Heydər Əliyev təqaüdünə layiq görülən tələbə, qazilər, idman nailiyyətləri qazanan, universitetin sosial və ictimai işlərində fəallıq göstərən tələbələr və universitetin gənc əməkdaşları iştirak ediblər.
