Gəncədə fəaliyyət göstərən universitet Koreyada təmsil olunub. Bu haqda 12 mart tarixində ATU-ya istinadən məlumat veririk.
Koreya Respublikasının Seul şəhərinə startap sahəsi üzrə tədris səfəri Asiya İnkişaf Bankı (AİB), “Asian Development Bank Institute” və CAREC Proqramı Azərbaycan, Gürcüstan, Qazaxıstan və Özbəkistandan olan dövlət nümayəndələri və ali təhsil müəssisələrinin əməkdaşları üçün təşkil olunub.
Azərbaycan Texnologiya Universitetinin strateji inkişaf və rəqəmsallaşma məsələləri üzrə rektor müşaviri Mehman Kərimov və İnnovasiya Mərkəzinin mütəxəssisi Tural Rüstəmov "Təlim və Koreya nümunəsi: Universitetlər zəngin startap ekosistemlərinin qurucusu kimi" adlı tədbirə qatılıblar. Burada iştirakçılar Koreyanın startap mərkəzlərinə səfər edib, AİB İnstitutu, Koreya ali təhsil müəssisələri və elm mərkəzlərinin ekspertləri ilə uğurlu startap ekosisteminin müxtəlif aspektlərini müzakirə edib, təcrübə mübadiləsi aparıblar.
Səfərin məqsədi startap sahəsində Koreya və iştirakçı ölkələr arasında bilik və bacarıqların mübadiləsini həyata keçirmək, habelə Koreyanın uğurlu startap nümunələrinin öyrənilməsini təşkil etməkdir.
