Gəncədə Azərbaycan Texnologiya Universitetində dəyirmi masa təşkil edilib. Bu haqda 26 yanvar tarixində ATU-ya istinadən xəbər veririk.
Universitetdə keçirilən Dünya Ekoloji Təhsil Gününə həsr edilmiş dəyirmi masa "Yaşıl dünya naminə həmrəylik ili" çərçivəsində baş tutub. Burada Göygöl Milli Parkının, 10 saylı Regional Ekologiya və Təbii Sərvətlər İdarəsinin nümayəndələri, Ətraf mühitin mühafizəsi kafedrasının əməkdaşları və ekologiya mühəndisliyi ixtisaslarının tələbələri iştirak ediblər.
Tədbirdə universitetin sosial məsələlər və ictimaiyyətlə əlaqələr üzrə rektor müşaviri Şahmar Həsənov bildirib ki, burada əsas məqsəd ictimai diqqəti ətraf mühit problemlərinə, onların həllinə yönəltməkdə və gələcəkdə mümkün fəsadların qarşısını almaqda ekoloji təhsilin və bu istiqamətdə maarifləndirmənin vacibliyini vurğulamaqdır. Daha sonra qeyd edilib ki, cəmiyyətin hər bir üzvünün ekoloji fəaliyyətlərdə aktiv iştirakı bəşəriyyət üçün olduqca vacibdir.
