Gəncədə tələbələrlə görüş baş tutub. Bu haqda 15 mart tarixində ATU-ya istinadən məlumat veririk.
“Narkotikə yox deyək" mövzusunda maarifləndirici tədbir Azərbaycan Texnologiya Universitetində (ATU) təşkil olunub. Burada universitetin sosial məsələlər və ictimaiyyətlə əlaqələr üzrə müşaviri Şahmar Həsənov, Gəncə şəhər Narkoloji Dispanserinin baş həkimi Etibar Xəlilov, şəhər Baş Polis İdarəsinin Narkotiklərlə mübarizə bölməsinin rəisi polis mayoru Rəşad Musayev, universitetin professor-müəllim heyəti və tələbələr iştirak ediblər.
Tədbirdə Etibar Xəlilov mövzunun əhəmiyyətindən, narkomaniyanın gənclərin şəxsiyyətinin, sağlamlığının inkişafına göstərdiyi mənfi təsirlərdən bəhs edərək, ondan qorunmanın vacibliyini vurğulayıb.
Rəşad Musayev narkomaniyanın törətdiyi fəsadlardan danışıb. Gənclərə bu kimi zərərli vərdişlərdən uzaq olmaq tövsiyə edilib.
Sonda tələbələrin sualları cavablandırılıb.
