Gəncədə növbəti tədbir keçirilib. Bu haqda 23 noyabr tarixində ATU-ya istinadən məlumat veririk.
Azərbaycan Texnologiya Universitetində baş tutan məlumatlandırma günü Azərbaycan Dövlət İqtisad Universitetinin (ADİU) koordinatoru olduğu, Avropa İttifaqının maliyyə dəstəyi ilə reallaşan “Azərbaycan Universitetlərində Yaşıl və Dayanıqlı Qlobal İqtisadiyyatın Təkmilləşdirilməsi: Bərpa Olunan Enerji və İqlim Dəyişikliklərinin Azaldılması” (REFRESH) Erasmus+ KA2 Layihəsi çərçivəsində təşkil olunub.
Burada ATU-nun tədris işləri üzrə prorektoru Raqif Hüseynov, strateji inkişaf və rəqəmsallaşma məsələləri üzrə müşavir Mehman Kərimov, ADİU-nun Beynəlxalq Əməkdaşlıq Departamentinin şöbə müdiri Afət Ələkbərova, ATU-nun struktur bölmə rəhbərləri və Ətraf mühitin mühafizəsi kafedrasının professor-müəllim heyəti, tələbələr iştirak ediblər. Hüseynov ATU-nun qoşulduğu REFRESH layihəsi barədə danışıb, universitet üçün, müvafiq kafedranın professor-müəllim heyəti, eləcə də tələbələr üçün faydalı olacağını bildirib.
Daha sonra Beynəlxalq əməkdaşlıq şöbəsinin müdiri vəzifəsini müvəqqəti icra edən Ramidə Xəlilova təqdimatla çıxış edərək layihənin fəaliyyət planı, idarə edilməsi və koordinasiyası, bərpa olunan enerji təhsili üzrə tərəfdaş olan Azərbaycan universitetlərində ilkin tədqiqatı, pilot kursların və innovativ kurikulumların dizaynı, virtual öyrənmə və simulyasiya (VLS) laboratoriyalarının Aİ modellərinin araşdırılması, disseminasiya, dayanıqlılıq, keyfiyyət planı və monitorinqi, layihədən gözlənilən nəticələr barədə ətraflı məlumat verib.
Sonda professor-müəllim heyətini və tələbələri maraqlandıran suallar cavablandırılıb.
