Gəncədə Azərbaycan Respublikası Qida Təhlükəsizliyi Agentliyinin mütəxəssisləri universitetlərin birində olublar. Bu haqda 27 fevral tarixində AQTA-ya istinadən xəbər veririk.
Adıçəkilən qurumun nümayəndələri Azərbaycan Dövlət Aqrar Universitetinin “Baytarlıq təbabəti” və “Zoomühəndislik” fakültələrinin sonuncu kurs tələbələri ilə görüşüblər. Burada Agentliyin fəaliyyət istiqamətləri, heyvan sağlamlığı və baytarlıq nəzarəti sahəsində görülən işlər barədə danışılıb.
Görüşdə, həmçinin tələbələr AQTA-nın strukturu, işə qəbul proseduru, karyera imkanları haqqında məlumatlandırılıblar və onların sualları cavablandırılıb. Daha sonra Agentlik tərəfindən 5 il ərzində həyata keçirilən tədbirləri özündə əks etdirən videoçarx nümayiş olunub.
Sonda qurumun Heyvan sağlamlığı və bioloji təhlükəsizlik şöbəsinin müdiri, respublikanın baş baytar müfəttişi Qalib Əbdüləliyev iştirakçılara “Baytarlıq sisteminin idarə olunması” mövzusunda mühazirə oxuyub.
