Gəncədə növbəti ərazidə abadlıq işləri görülüb. Bu haqda 26 fevral tarixində MKTİB-yə istinadən xəbər veririk.
Xocalı Soyqırımına həsr olunan “Ana Harayı” abidəsinin ətrafında mövsümi güllər əkilib. İşlər Mənzil Kommunal Təsərrüfatı İstehsalat Birliyinin Yaşıllaşdırma şöbəsi tərəfindən görülüb. Şöbənin əməkdaşları tərəfindən ərazidə, həmçinin dekorativ güllər əkilib, mövcud yaşıllıqlara aqrotexniki qulluq göstərilib.
Qeyd edək ki, 1992-ci ilin 25 fevralından 26-sına keçən gecə erməni vandalları 366-cı motoatıcı alayın köməyi ilə Xocalı şəhərinə hücum edərək dinc əhaliyə qarşı divan tutublar. Nəticədə tarixin qanlı səhifələrinə düşən dəhşətli gecədə 106-sı qadın, 63-ü uşaq, 70-i yaşlı insan olmaqla 613 nəfər qətlə yetirilib, 1275 nəfər əsir götürülüb, 150 nəfərin taleyi isə bu günə qədər də naməlum olaraq qalır.
