Gəncədə universitetlərdən birində iclas təşkil olunub. Bu haqda 11 aprel tarixində ATU-ya istinadən məlumat veririk.
Tədbir Azərbaycan Texnologiya Universitetində keçirilib. İclas Bakı Biznes Universitetinin koordinatorluğu və Avropa Komissiyasının maliyyə dəstəyi ilə həyata keçirilən “Azərbaycanda Rektorlar Konfransının yaradılması” (ECAR) adlı Erasmus+ layihəsi çərçivəsində baş tutub. Görüşə 15-ə yaxın ali təhsil müəssisəsindən məsul şəxslər qatılıblar.
Burada ATU-nun tədris işləri üzrə prorektoru Raqif Hüseynov layihənin təhsilin beynəlmiləlləşməsinə, eləcə də rəqəmsal və innovativ iqtisadiyyatda ali təhsil müəssisələrinin rolunu artırmaq məqsədilə universitetlərarası əlaqələrin təmin olunmasına əhəmiyyətli dərəcədə dəstək verdiyini vurğulayıb.
Azərbaycan Dillər Universitetinin Beynəlxalq əlaqələr üzrə prorektoru, Ali təhsildə beynəlmiləlləşmə üzrə komitənin əvvəlki sədri Jalə Qəribova tərəfdaşlara müvafiq komitənin hesabatını təqdim edib, daha sonra Bakı Biznes Universitetinin Beynəlxalq əlaqələr üzrə prorektoru Eşqin Bayramov komitə sədri və sədr müavinlərinin yenidən seçkisi barədə iştirakçılara məlumat verib. Daha sonra səsvermə həyata keçirilib.
