Gəncədə iki universitetdə tədbir baş tutub. Bu haqda 26 fevral tarixində təhsil ocaqlarına istinadən xəbər veririk.
Azərbaycan Dövlət Aqrar Universitetində və Azərbaycan Texnologiya Universitetində Xocalı soyqırımının 32-ci ildönümünə həsr olunan tədbir keçirilib. Hər iki universitetdə tədbirlərin açılışında şəhidlərin əziz xatirəsi bir dəqiqəlik sükutla yad edilib. Tədbirlərdə universitetlərin professor-müəllim heyəti, tələbə kollektivi və şəhər ictimaiyyətinin nümayəndələri iştirak ediblər.
Azərbaycan Dövlət Aqrar Universitetində çıxış edən universitetin rektoru Zəfər Qurbanov bildirib ki, Xocalı faciəsi qurbanlarının və doğma torpaqlarımızın azadlığı uğrunda canlarından keçən bütün şəhidlərimizin qisasını alınıb. Şəhidlərimizin qanı yerdə qalmayıb. Azərbaycan Texnologiya Universitetində qeyd olunub ki, Xocalıda baş verən faciə təkcə Azərbaycan xalqına deyil, bütöv bəşəriyyətə qarşı törədilən ən ağır cinayətlərdən biridir.
Universitetlərdə təşkil olunan ildönümlərində tələbələrin ifasında bədii kompozisiyalar nümayiş etdirilib, Xocalı faciəsinə və Xocalının azad edilməsinə həsr olunmuş videoçarx nümayiş etdirilib.
