Gəncədə tələbələr üçün tədbir keçirilib. Bu haqda 6 mart tarixində ADAU-ya istinadən məlumat veririk.
Od çərşənbəsi və 8 Mart - Beynəlxalq Qadınlar Günü münasibətilə şənlik Azərbaycan Dövlət Aqrar Universitetinin (ADAU) Əsaslı Kitabxanasında baş tutub. Burada Tədris işləri üzrə prorektor Əhməd Məlikov, Tərbiyə işləri üzrə prorektor Aidə Qasımova, bir sıra kafedra müəllimləri, kitabxana əməkdaşları və fəal tələbələr iştirak ediblər.
Çıxış edənlər təbriklər səsləndirərək, xoş arzularını çatdırıblar. Kitabxananın foyesi bayram atributları ilə bəzədilib. Dərnək üzvlərinin iştirakı ilə musiqilər səsləndirilib və milli rəqslərimiz nümayiş olunub. Novruzun milli atributlarından olan Kosa və Keçəl də burada çıxış ediblər.
Qeyd edək ki, şənlik ADAU-nun Əsaslı Kitabxanasının və Elektrik mühəndisliyi kafedrasının birgə təşkilatçılığı ilə baş tutub.
