Gəncədə ali təhsil müəssisəsi növbəti əməkdaşlığa başlayıb. Bu haqda 30 mart tarixində ADAU-ya istinadən məlumat veririk.
Azərbaycan Dövlət Aqrar Universitetində “Hacıqabul Quşçuluq Şirkəti” MMC-nin rəhbərliyi ilə görüş təşkil olunub. Burada şirkətin direktoru Nemət Babaşov, Keyfiyyətə nəzarət şöbəsinin müdiri Şəlalə Zeynalova, baş baytar həkim Tarık Odabaşı və ADAU rəhbərliyi iştirak ediblər.
Universitetin rektoru Zəfər Qurbanov əməkdaşlıq məsələlərinə toxunub. Sonra Nemət Babaşov təmsil etdiyi şirkət haqqında məlumat verib. Bildirilib ki, fabrik hazırda illik 648 000 000 ədəd yumurta istehsal gücü ilə ölkəmizin və Zaqafqaziyanın ən böyük yumurta istehsalçısıdır.
Görüşdə birgə əməkdaşlıq, tələbələrin təcrübə məsələləri, birgə elmi-tədqiqat işlərinin aparılması və digər məsələlər müzakirə olunub.
Sonda ADAU ilə “Hacıqabul Quşçuluq Şirkəti” MMC arasında birgə memorandum imzalanıb.
