Gəncədə Azərbaycan Dövlət Aqrar Universitetində Heydər Əliyevin anadan olmasının 101-ci ildönümünə həsr olunmuş elmi-praktik konfrans keçiriləcək. Bu haqda 20 aprel tarixində ADAU-ya istinadən xəbər veririk.
Tədbir 14 may tarixində “Beynəlxalq Bitki Sağlamlığı Günü: Dayanıqlı Kənd Təsərrüfatında Bitki Amili” mövzusunda aparılacaq. Konfransın işçi dilləri Azərbaycan, türk, rus və ingilis dilləridir. Burada iştirak forması əyanidir.
Konfransda aşağıdakı bölmələr üzrə məruzələr qəbul olunur:
- Bitki sağlamlığı sahəsinin inkişafı üzrə prioritetlər;
- Ölkə ərazisi üzrə bitki sağlamlığının izlənilməsi və mövcud vəziyyətin təhlil edilməsi;
- Bitki sağlamlığı sahəsi üzrə ixtisaslı kadrların hazırlanması;
- Bitki sağlamlığı ilə bağlı prioritet sahələr üzrə elmi-tədqiqatların aparılması;
- Bitki sağlamlığı sahəsində dövlət proqramları və inkişaf konsepsiyalarının hazırlanması;
- Fitosanitar nəzarəti sahəsində fermerlərin, ailə təsərrüfatlarının və sahibkarların maarifləndirilməsi;
- Bitkiləri və bitki sağlamlığını qorumaq üçün monitorinq və erkən xəbərdarlıq sistemlərini gücləndirmək;
- Ətraf mühitin təhlükəsizliyi nəzərə alınaraq, bitki sağlamlığının qorunması üçün davamlı olaraq zərərvericilərin və pestisidlərin idarə olunması;
- Bitki karantini və bitki mühafizə tədbirlərinin tətbiqi;
- Beynəlxalq ticarət və səyahət zamanı zərərli orqanizmlərin yayılması riski;
- Müvafiq orqanların bitki sağlamlığı ilə bağlı fəaliyyətlərinin əlaqələndirilməsi;
- Bitki biomüxtəlifliyi və monitorinqi;
- Bitkiçilik və bitki sağlamlığı təhsili və maarifləndirmə;
- Bitki sağlamlığı istiqamətində xarici dövlətlərin qabaqcıl təcrübəsinin öyrənilməsi;
- Bitki resurslarının idarə olunması və bu sahədə beynəlxalq təcrübə;
- Qida təhlükəsizliyi sahəsində dövlət siyasətinin istiqamət və prinsipləri;
- BMT-nin 2030-cu il gündəliyinə daxil olan "Sıfır Aclıq" hədəfinə nail olmaq üçün bitkilərin sağlam saxlanmasının vacibliyi;
- Bitki sağlamlığına dair innovasiyaların tətbiqi, tədqiqat və təbliğat işləri üçün investisiyaların təşviqi.
- Torpaq-bitki sistemində su və qida rejiminin nizamlanması;
- Respublika torpaqlarının müasir vəziyyəti.
Materialların tərtibinə qoyulan tələblər:
- Məruzələr Azərbaycan, türk, rus və ingilis dillərindən (elektron variantda) birində qəbul olunur;
- Məruzənin mətni 4-6 səhifə həcmində, kompüterdə Microsoft Word formatında, Arial şriftlə (hərflərin ölçüsü -12 pt., interval – 1.5, abzas - 1.25), sətirdən-sətrə keçirilmədən yığılmalı, boş sahələrin ölçüləri soldan - 25 mm, sağdan -15 mm, yuxarı və aşağıdan - 20 mm olmaqla, A4 formatlı standart (210x297 mm) kağızda çap olunmalıdır;
- Mətnin əvvəlində, ortadan qalın və böyük hərflərlə məruzənin adı (Azərbaycan, rus və ingilis dillərində), altından bir sətir boş buraxmaqla adi və kiçik hərflərlə məruzəçinin elmi dərəcəsi, elmi adı, adı, atasının adı, soyadı, onun altında işlədiyi təşkilatın və şəhərin adı, ondan da altda müəllifin elektron poçt ünvanı, bir sətir boş buraxılmaqla abzasdan kursiv və kiçik hərflərlə məqalənin yazıldığı dildə qısa xülasə, 5 sözdən ibarət açar sözlər yazılmalıdır;
- Məruzədə istifadə edilmiş istinadlar APA 6 stilində (Məmmədov, 2018) müəllifin və ya müəlliflərin soyadı və çap ili qeyd olunmaqla, istifadə olunmuş ədəbiyyatların siyahısı isə mətnin sonunda əlifba sırası ilə APA 6 stilində göstərilməlidir;
- Materiallar 10 may tarixinədək conference @adau.edu.az e-mail ünvanına göndərilməlidir;
- Konfransa təqdim olunmuş və təşkilat komitəsi tərəfindən seçilmiş materiallar konfransın materialları toplusunda nəşr ediləcəkdir. Burada əyani olaraq məruzə ilə çıxış edən şəxslərə sertifikat təqdim ediləcək.
