Azərbaycanın Xalq artisti Adil Müseyib oğlu Bayramovun bu gün 73 yaşı tamam olur.
Gencexeber.az məlumat verir ki, Adil Bayramov 7 iyul 1953-cü ildə anadan olub. Orta təhsilini Gəncə şəhərində M.Qorki adına 1 nömrəli tam orta məktəbdə alıb. Musiqiyə marağı erkən yaşlarından formalaşan sənətkar 1965-ci ildə Gəncə şəhər 2 nömrəli Uşaq Musiqi Məktəbinin tar sinfinə qəbul olunub. O, 1970-ci ildə həmin məktəbi bitirdikdən sonra təhsilini Qəmbər Hüseynli adına Gəncə Musiqi Texnikumunun tar sinfində davam etdirib və 1976-cı ildə oranı əla qiymətlərlə başa vurub.
Əmək fəaliyyətinə 1972-ci ildə Gəncə şəhər Mədəniyyət Şöbəsinin 4 nömrəli Uşaq Musiqi Məktəbində tar müəllimi kimi başlayan Adil Bayramov sonrakı illərdə Gəncə şəhər 1 nömrəli Uşaq Musiqi Məktəbində müəllim, Azərbaycan Dövlət Aqrar Universitetinin və Azərbaycan Texnologiya Universitetinin xalq çalğı alətləri orkestrlərində dirijor kimi çalışıb. O, həmçinin İnşaatçılar Mədəniyyət Sarayının "Şərq" xalq çalğı alətləri ansamblına rəhbərlik edib və müxtəlif musiqi kollektivlərində fəaliyyət göstərib.
1985-ci ildən Gəncə Dövlət Filarmoniyasının Göygöl Dövlət Mahnı və Rəqs Ansamblında musiqiçi kimi fəaliyyətə başlayan sənətkar 1998-ci ildən kollektivin bədii rəhbəridir. Ansambl Almaniya, Meksika, Türkiyə, Macarıstan və İordaniya da daxil olmaqla bir sıra ölkələrdə Azərbaycan musiqi mədəniyyətini uğurla təmsil edib.
Sənətkarın çoxillik fəaliyyəti dövlət tərəfindən yüksək qiymətləndirilib. O, 2007-ci ildə "Əməkdar artist", 2017-ci ildə isə "Xalq artisti" fəxri adına layiq görülüb.
