Bakıda milyonlarla manatlıq vergi pozuntuları ilə gündəmə gələn "Okean Avtosalon"un hüquqşünası həbs edilib.
Qaynarinfo.аz xəbər verir ki, 1984-cü il təvəllüdlü, Şəmkir rayonunun Seyfəli kəndindən olan hüquqşünas barəsində Cinayət Məcəlləsinin 178.2.2 (dələduzluq — etibarın sui-istifadəsi ilə) və 178.2.3 (külli miqdarda ziyan vurmaqla) maddələri ilə cinayət işi açılıb və məhkəmədə baxılıb.
Araşdırmalar zamanı məlum olub ki, həmin şəxs 2024-cü il iyunun 1-də "Okean Avto 2011" MMC-yə hüquqşünas vəzifəsinə qəbul olunub. İşə başlamazdan əvvəl mərc oyunlarına aludə olduğuna və uduzduğuna görə xeyli borcu yaranıb. O, borclarını ödəmək məqsədilə şirkətə məxsus avtomobil satışlarından əldə olunan pulların bir qismini götürərək mərc oyunlarında istifadə edib. Lakin həmin vəsaiti də uduzub.
Bundan başqa, o, MMC-yə kredit borcu olan bir neçə şəxsdən 39 000 manatdan çox pul alaraq, şirkətə təhvil verməyib və şəxsi ehtiyaclarına xərcləyib.
Səhiyyə Nazirliyinin Elmi-Tədqiqat Travmatologiya və Ortopediya Şöbəsinin arayışına əsasən, təqsirləndirilən şəxs əmək qabiliyyəti olmayan və III qrup əlildir.
Məhkəmənin hökmü ilə o, 2 il 6 ay müddətinə azadlığın məhdudlaşdırılması cəzasına məhkum edilib. O, bu müddətdə elektron qolbaqla nəzarətdə saxlanılacaq və əlavə olaraq 1 il 6 ay müddətinə rəhbər və ya maddi məsul vəzifə tutmaq hüququndan məhrum edilib.
Qeyd edək ki, İqtisadiyyat Nazirliyi yanında Dövlət Vergi Xidmətinin Bakı şəhəri Lokal Gəlirlər Baş İdarəsinin "Okean Avtosalon"da keçirdiyi səyyar yoxlamalar nəticəsində də külli miqdarda vergi pozuntuları aşkar edilib.
