Üzgüçülüklə həm həvəskarlar, həm də peşəkar idmançılar məşğul olurlar. Bəs görəsən, üzgüçülüyün sağlamlığımıza nə kimi faydaları var?
Mövzu ilə bağlı Gencexeber.az-a açıqlama verən həkim-terapevt Abbas Bağırovun sözlərinə görə, insan orqanizminin 66 faizi sudan ibarətdir:
“Bəlkə də elə ona görədir ki, insan su ilə təmasda olduqda pozitiv, ritmik və harmonik notlara yüklənmiş olur. Əlbəttə ki, üzgüçülük populyar idman növlərindən biri olmaqla bərabər həm də bir çox xəstəliklər üçün ən effektiv müalicədir.
Suyun içərisində orqanizm vakuum şəraitində olduğuna görə, bütün özünü tənzimləmə mexanizmi sistemləri adekvat şəkildə işləməyə başlayır. Bu da sinir sistemində mərkəzi və periferik tipli bütün gərginliklərin aradan qalxmasına səbəb olur”.
A.Bağırov qeyd edib ki, üzgüçülük ürək-damar sistemini gücləndirir:
“Üzgüçülük ürək-damar və tənəffüs sisteminin fəaliyyətinə, oynaq sistemində olan bütün xəstəliklərə və yuxusuzluğa müsbət təsir göstərir. Üzgüçülüklə proqram şəklində məşğul olduqda ürək döyüntüsü, habelə nəbzin ritmi normallaşır, qan dövranı yaxşılaşır bu da ürək xəstəlikləri riskini azaldır. Üzgüçülük tənəffüs sistemini gücləndirir, ağciyərlərin daha çox hava tutmasına kömək edir. Bu, astma və digər tənəffüs problemləri olan insanlar üçün faydalıdır. Həmçinin üzgüçülük nəfəs almanı təkmilləşdirərək bədənə oksigenin daha yaxşı paylanmasına imkan verir. Bunun fonunda da həm həzm sistemindən, həm də sidik ifrazı sistemlərindən toksinlərin, sərbəst radikalların və ifrazat maddələrinin orqanizmdən xaric olmasını sürətləndirməklə orqanizmin drenaj funksiyasını yerinə yetirən ən mühüm vasitələrdən biri kimi özünü təsdiqləyir.
Yuxusuzluqdan əziyyət çəkən insanlar üzgüçülük ilə məşğul olduqda xroniki yorğunluq yüngülləşir və yuxu tənzimlənlənməsi təbii xarakter alır.
Üzmə zamanı suyun müqaviməti ilə üzləşərkən bütün bədən əzələləri işləyir, bu da həm üst, həm də alt bədən əzələlərini inkişaf etdirir, beləliklə əzələlərin daha tonuslu və güclü olmasına kömək edir. Oynaqlarında problem yaşayan və ya artrozdan əziyyət çəkən insanlar üçün üzgüçülük faydalıdır. Suyun üzərində bədən ağırlığının çəkisizlik vəziyyətinə uyğunlaşdırıldığı halda olunan hərəkətlərlə oynaq zədələnmələrinin bərpası istiqamətində gedən biokimyəvi proseslərin sürəti artır və əlavə travma riski da azalır.
Sinir gərginlikləri tamamən aradan qalxır. Sinir sistemi nə qədər sakit vəziyyətdə olsa, orqanizmin xəstəliklərə qarşı o qədər müqaviməti çox olur. Üzgüçülük qığırdaq və oynaqda hərəkəti artırır. Qidalandırıcı maddələrin oynağa axımını sürətləndirir. Toxumalar özünü tez bərpa edir”.
Həvəskar üzgüçülərdən biri - Gültəkin Kərimova Gencexeber.az-a danışıb.
O bildirib ki, üzə bilməyən şəxslərə məsləhətim odur ki, sudan qorxmasınlar:
“Mənim hazırda 34 yaşım var. Doqquz yaşımdan üzgüçülüklə məşğulam. Anam üzgüçülük üzrə məşqçidir, üzməyi mənə uşaq yaşlarımdan öyrədib. Üzgüçülüklə ancaq bir həvəskar olaraq məşğul olmuşam. İndiyə qədər iki yarışda iştirak etmişəm. Hər ikisi də “Kürü keçək” layihəsi olub. İlk yarışda 3-cü yerə, ikinci yarışda isə 2-ci yerə sahib olmuşam. Başqa idman növlərindən fərqli olaraq, üzgüçülükdə travma riskləri minimuma enir. Üzə bilməyən şəxslərə məsləhətim odur ki, sudan qorxmasınlar. O qorxunun üzərinə gəlməlidirlər”.
Nəzrin Vahid
