Gəncənin tanınmış boks mütəxəssislərindən biri, Azərbaycanın Əməkdar məşqçisi Çingiz Məmmədov dünyasını dəyişib.
Gencexeber.az-ın məlumatına görə, Çingiz Məmmədov uzun illərdir yaşadığı Türkiyənin Antalya şəhərində vəfat edib. O, bir ildən artıq müddətdə xərçəng xəstəliyindən müalicə alıb. Əfsus ki, son bir ayda reanimasiya şöbəsinə yerləşdirilən məşqçinin həyatını xilas etmək mümkün olmayıb.
Ailəsinin qərarına əsasən, Çingiz Məmmədov dünən Antalyada dəfn olunub.
Çingiz Məmmədov 1951-ci il mayın 27-də Gəncə şəhərində anadan olub. Boksla 1967-ci ildə Gəncədəki “Dinamo” idman cəmiyyətində məşğul olmağa başlayıb. Daha sonra “Neftçi” idman cəmiyyətinə keçərək öz ustalığını artırıb. 1971–1973-cü illərdə Qafqaz Hərbi Dairəsinin çempionu, ümumittifaq turnirlərinin mükafatçısı olub.
1979-cu ildə Azərbaycan Dövlət Bədən Tərbiyəsi İnstitutunu bitirərək Gəncədə məşqçi fəaliyyətinə başlayıb. 1982–1991-ci illərdə “Məhsul”, “Dinamo” və UGİM-də çalışıb. 1992-ci ildən Türkiyəyə dəvət olunaraq, illərlə məşqçi kimi çalışıb, habelə Türkiyənin boks yığmasının məşqçisi kimi də fəaliyyət göstərib. Bu illər ərzində o, Avropa və dünya səviyyəli yarışların qaliblərini yetişdirib.
Onun yetirmələri arasında Oqtay İbrahimov, Hüseyn Məmmədov, Bayram və İntiqam Bayramov qardaşları, A.Məmmədov kimi tanınmış idmançılar yer alır. Oqtay İbrahimov SSRİ yığmasının tərkibində beynəlxalq yarışlarda medallara layiq görülüb.
1986-cı ildə Çingiz Məmmədova Azərbaycanın Əməkdar məşqçisi fəxri adı verilib.
Azərbaycan və Türkiyə idman ictimaiyyəti bu böyük mütəxəssisin itkisini dərin hüznlə qarşılayır. Allah rəhmət eləsin.
