Olimpiya çempionu “Kəpəz”lə bağlı fikirlərini bölüşüb. Bu haqda 4 aprel tarixində futbol klubuna istinadən məlumat veririk.
Sərbəst güləşçi Toğrul Əsgərov bildirib ki, “Kəpəz”in də “Qarabağ” kimi avroturnirlərdə Gəncəni, ölkəmizi təmsil etməsini istəyir. O, klubda həyata keçirilən layihələrdən də danışıb.
“Bilirsiz ki, yeni baza tikilib, akademiya istifadəyə verilib, məktəb yaranır. Bu amillər komandanın inkişaf edəcəyini göstərir. Amma mütləq şəkildə kluba sponsor lazımdır. Böyük maliyyə dayağı olmadan böyük ideyaları həyata keçirmək olmaz. Gəncənin həmişə güclü futbol məktəbi olub. Ona görə də akademiyanın futbolun inkişafına çox böyük faydası olacaq”, - deyə idmançı qeyd edib.
Toğrul Əsgərov yeni tikilən stadion barədə də danışıb. O, azarkeşlərin uzun illər həsrətini çəkdiyi arenanın tamaşaçı sayının artmasına xidmət edəcəyini deyib.
“Köhnənin yerində yeni stadion tikilir. “Kəpəz” kimi azarkeşi olan futbol komandası çox azdır. Onlar klub üçün böyük dəstəkdir. Komandanın azarkeşinin olması rəqiblərlə mübarizəyə 1:0 öndə başlamaq deməkdir. İnanıram ki, yeni tikilən stadionda Gəncə azarkeşlərinin sayı daha da artacaq. Komandamız da uğurlu çıxış edəcək. Biz də nəticələrə sevinib, hər zamankı kimi azarkeşlik edəcəyik”, - deyə Toğrul Əsgərov əlavə edib.
